Kæru landar, verið hjartanlega velkomin á árshátíð Íslendingafélagsins í Stokkhólmi!

* Hvenær: laugardaginn 20. mars kl. 18

* Hvar: Fellows, Brunnsgatan 6, Östermalm

* Verð: 450 kr fyrir félaga og námsmenn, 600 kr. fyrir aðra.

* Veislustjóri: Guðlaug Elísabet Ólafsdóttir, leikkona, grínari og uppistandari með meiru

* Fram munu koma: Friðrik Ómar júróvisjón sjarmör og Halla Vilhjálmsdóttir, söng- og leikkona. Eftir borðhald mun hinn frábæri DJ Aronsky sjá um að þeyta skífum fram til kl. 01.30.

* Í boði: Fordrykkur og glæsilegt hlaðborð undir karabískum áhrifum

* Barinn býður upp á allt það helsta og heitasta á markaðnum

Miðafjöldi er takmarkaður, tryggðu þér miða með því að leggja inn á reikning Íslendingafélagsins: Plusgiro 40 39 35-0. Gefðu upp nafn og fjölda miða. Að sjálfsögðu má greiða félagsgjöldin samtímis: 150 kr. eða 250 kr. fyrir fjölskyldu.

Húsið er lokað meðan á borðhaldi stendur, frá 19  – 22, og eftir það kostar miðinn 250 kr.

Eftirtaldir aðilar bjóða uppá glæsilega happdrættisvinninga: Icelandair, 3Sagas, Serrano, Marý hönnuður, 66° norður, Blue lagoon húðvörur, Best á lambið kryddið, Prjónaperlur, Tóta hárgreiðslumeistari og Íris naglasérfræðingur

Hlökkum til að sjá ykkur – Nefndin.

Fréttir

Leshringurinn hittist þriðjudaginn 2. mars í heimahúsi til að ræða bókina Boktjuven, og til að skipuleggja frekari lestur. Áhugasömum er bent á að hafa samband við Ólöfu: olofeiriks@hotmail.com.

Fréttir

Cary Grant lærir að prjóna

Laugardaginn 6. mars er prjónakaffi á hefðbundnum stað; Café NoCo, Odengatan 47 kl. 10.30. Cary Grant verður með sýnikennslu í prjóni (not!).

Allir velkomnir!

Fréttir

Íslendingafélagið stendur fyrir bjórkvöldi 25. febrúar n.k. á Bishops Arms, Vasagatan 7, frá kl. 18.
Skál í boðinu !

Bishops Arms

Fréttir

Menningarklúbbur Íslendingafélagsins fer á leikritið Dauðadansinn eftir Strindberg í Stadsteatern, Kulturhuset, 24. apríl kl.18. Hittist áður kl. 17 á Teaterbaren í sama húsi til að spjalla um verkið. Hægt er að nálgast leikritið á prenti á íslensku hjá Ólafi Sveinssyni, hafið samband með því að senda línu á olafursv@hotmail.com. Áhugasamir bóka sjálfir miða á sýninguna á heimasíðunni www.stadsteatern.stockholm.se.

Dödsdansen

Fréttir

Tilkynning frá Íslensku kirkjunni í Svíþjóð;

Starf Þjóðkirkjuprests fyrir Íslendinga í Svíþjóð er formlega lagt niður 1. apríl 2010, en prestur starfar áfram í hlutastarfi fram á vor m.a. til að ljúka fermingum. Þetta kemur til vegna sparnaðar Þjóðkirkjunnar eftir gengishrun íslensku krónunnar. Vegna óvissu um framhald starfsins hefur Íslenska kirkjan ekki gefið út „Fréttabréf“ fyrir starfið í vor eins og undanfarin misseri.

Eftir að þetta var ljóst hefur prestur ásamt sóknarnefnd Íslensku kirkjunnar og biskupi Íslands unnið að því að finna nýja fjármögnun fyrir íslenska kirkjustarfið í Svíþjóð.

Undirritaður er kominn í hlutastarf við að taka á móti sjúklingum sem koma til Gautaborgar frá Íslandi vegna líffæraflutninga og annarra aðgerða. Einnig erum við í viðræðum við sænsku kirkjuna um aðstoð við að halda uppi almennu kirkjustarfi meðal Íslendinga. Við erum vongóð um að geta fengið hlutastarf í prestsþjónustu fyrir Íslendinga með þeirra hjálp, en ekkert er ákveðið ennþá. Ef vonir okkar rætast þá verður íslenska kirkjustarfið starfrækt áfram, en með ákveðinni forgangsröðun og prestur töluvert bundnari í Gautaborg en áður.

Nú vitum við ekki hvernig styrkir til starfsins verða á þessu ári og þvi verðum við að draga úr ferðalögum. En barnastarfið hefur forgang og er tvisvar í mánuði í Lundi, Uppsölum og Gautaborg. Það er að mestu unnið af heimafólki en með okkar tilstyrk. Sama gæti átt við um Stokkhólm ef við hefðum leiðtogahóp sem tæki að sér umsjón kirkjuskólans og prestur þyrfti ekki að koma í hvert skipti.

Í Stokkhólmi er fjölskylduguðsþjónusta ráðgerð 18. apríl n.k kl. 14.00 í Norsku kirkjunni. Dagskráin í maí og júní verður auglýst síðar.

Við auglýsum jafnframt eftir fólki sem vill taka þátt í að halda utan um kirkjuskólasamverurnar. Ef við fáum eins og 4 einstaklinga sem vilja vera með og skiptast á að vera með kirkjuskólann getum við haldið uppi mánaðarlegum samverum. Vinsamlegast gefið ykkur fram við prest eða stjórn Íslendingafélagsins ef þið viljið taka þátt í þessu starfi. Þeir sem vilja taka þátt í þessu með okkur myndu síðan hittast 18. apríl næstkomandi til að ræða framhald starfsins.

Með bestu kveðju,

Ágúst Einarsson, 070 286 39 69, kirkjan@telia.com

Fréttir

Kirkjuskóli og fjölskyldusamvera í Norsku Kirkjunni, Stigbergsgatan 24 á Söder, sunnudaginn 7. febrúar kl 14.  Sungið, litað, teiknað og „fíkað“ saman af kaffihlaðborði sem Íslendingafélagið sér um.  Ágætt tækifæri fyrir barnafólk að hittast og leyfa krökkunum að leika saman.

Prjónakaffi á Café NoCo, Odengatan 47, laugardaginn 13. febrúar 11-13.  Komdu og sýndu okkur hvað þú ert með á prjónunum, heklunálinni eða útsaumsnálinni !  Góð morgunverðartilboð á staðnum, t.d. ristuð beygla með rjómaosti, sultu og kaffibolla á litlar 38 krónur.

Bjórkvöld á Bishops arms, Vasagatan 7, fimmtudaginn 25. febrúar frá kl 18.  Skjálftinn tekin fram í tilefni íslensku gestanna sem eiga frátekin borð eins og alvöru fastagestum sæmir.

Nýr leshringur er að fara af stað. Ákveðið hefur verið að lesa „Boktjuven“ (The Book thief, 2005) eftir Markus Zusak sem er marg verðlaunaður rithöfundur í heimalandinu Ástralíu sem og í Bandaríkjunum. Að sjálfsögðu velja lesendur á hvaða tungumáli þeir vilja lesa. Hjá Bokus er hægt að panta bókina á sænsku á 49kr.  Hugmyndin er að hittast í lok febrúar og ræða um innihald bókarinnar og taka ákvörðun um framhald leshringsins. Áhugasamir vinsamlega hafið samband við Ólöfu Eiríksdóttur í síma 0736941133 eða olofeiriks@hotmail.com.

Í mars verður svo árshátíð félagsins haldin með pompi og prakt, árshátíðarnefndin er komin af stað með undirbúningin – við stefnum á 20. mars, takið daginn frá !

Fréttir

Landar okkar hjá Íslendingafélaginu í Árósum og nágrenni vilja bjóða Stokkhólms-íslendinga sérstaklega velkomna  á alvöru sveitaball, 6. febrúar 2010;

Frá Stokkhólmi er hægt að keyra, fljúga eða taka lest til Álaborgar (Aalborg).  Kíkið á möguleikana; www.metjet.se, www.sj.se (til Köben og svo áfram)

Sálin klikkar ekki

Fréttir

Kæru landar af fegurra kyninu !

Næstkomandi laugardagskvöld verður haldið ”ladies night” á vegum Íslendingafélagsins.  Nú er lag að kynna íslenska hönnun utan landsteinanna…. stefnan er að eiga saman huggulegt kvöld í heimahúsi í Bromma, dáðst að nýrri íslenskri hönnun, máta, handleika muni og etv versla.

Boðið verður upp á léttar fljótandi veigar og góðgæti að heiman.  

Meðal annars verða kynntar vörur frá Hringa (www.hringa.is) og Arca-design, dót frá (www.fafutoys.com),  skartgripir frá Erlu Lillendhal og fleira spennandi.  Þeir sem hafa áhuga á geta keypt eða pantað á staðnum.  Tekið við staðgreiðslu.

Allar hjartanlega velkomnar að koma og eiga kvöldstund með kynsystrum sínum.

Tími: 20:00
Dagur: Laugardagurinn 16. janúar
Staður: Asbjörnsens väg 9, 167 61 Bromma (pendeltåg Nockebybanan)

Nánari upplýsingar í s 076 861 6300 / María

Fréttir

Þar sem síðasta bjórkvöld var stórkostlega vel heppnað var samhljóma álit viðstaddra að endurtaka leikinn og nú á nýjum og spennandi stað.  Fimmtudaginn 21. janúar verður hist á Monk´s,  Sveavägen 39.  Pöbbinn lofar úrvali uppá hvorki meira né minna en 1.400 bjórtegundir svo allir ættu að finna sér einhvað við hæfi. 

Íslenskir drykkjufélagar verða á staðnum frá kl 18. 

Nánar um Monk´s má finna á http://www.monkscafe.se/sveavagen/

Fréttir